احلام عبد الزهرة

افلام الرصافة المتحدة         افلام الكرخ المتحدة

تقدم                         تقدم

الفلم العراقي الجديد

احلام

عبد الزهرة

سيناريو واخراج

علاء العبادي

عبد الزهره باحلامه
ما حقق بس اوهامه
راضي باحلامه وقانع
يدري العمر موضايع
عاشق يتمنى الايام
تتحقق بيها الاحلام
واحلام العاشق تبقه
مضروبة جنها بطلقه
لو ضاعت ما ظنه يتوب
لو حققها تصير ذنوب


القصة
حوار
انتاج
موسيقى
تمثيل

من التراث الشعبي البغدادي

اهل الولاية

ابطال الفلم

مجموعة من الفرق الشعبية

نخبة من اهالي بغداد

عبد الزهرة
سوزي
مرزة
جابر
القاضي
انيسة
عديلة
مامي
مهيدي
عبد السادة

بطل الفلــم

بطلة الفلــم

صديق البطل

رئيس العصابة

ابو سـوزي

ام سـوزي

ام عبد الزهرة

خدامة في بيت القاضي

العمــــدة

صديق رئيس العصابة


شفت البطل ع الشاشه
وحده بطرك دشداشه

شايله كوشر طلقات
طلعوله عشرة ومامات

الهندي الاحمر شافه
كام يعضعض بشفافه

ثاري البطل من خوفه
خاتلـة وره الطوفة

الهندي الاحمر كله
تطلع لو اضـربك كله

الهندي اسمه مرزه
وبـأيــده زارع خرزه

ويكلـه الهندي الاحمـر
ليش جبنت يا قشمر

البطل كله اعصابك
صوجي من جيت البابك

شفتك وحدك بالــكونه
محصور أدور عونه

و هـاي العصابه تريدك
كاعك يردوها وبيتك

وانته بنظرهم دوده
وكلها ابوابك مسدوده

خليني يمك كلـه
بلكت نكـسب هـالـجولة

ذولــة العصابة هواية
والقتـل عدهم غايه

وانته وحدك ياخويه
وصابغ وجـهك بالبويه

ومكيف عندك خنجر
وسجينة بيهـن تـفتر

بس اني عندي مسدس
جيكوسلفاكي و اخرس

وعندي رشاشة وطلقة
كل وحدة أدمر فـرقة
و عندي قامة و مـصياده
مخيسهن من حماده

و عنـدي مـكوار شلونه
جتال و اسود لونه

والحرب تدري خدعه
و الاغبر بيها تصرعه

بـوحدتنه يمكن نغلب
ولو فكس حظنه نكلـب

مد ايده الهندي وكله
يبدو لي الشغـلة سهــلة

البطل كله اوكي شوفنه
مجـين بيه فـي

شــوفنة مجين بارد
وبالصحرا كافي اطارد

ناكــل لكــمة هنيه
ونشــرب وياها اميه

الهندي كلـه شنـاكل
كــله بيض وفلافــل

الهـندي كـله ماشي
عبــالي دبـس وراشي

و من اكلوا اخذوا غفه
نـايم وسـلاحه بصفـه

تـالي العصابة فشوا
من أيـسوا مـنهم طشوا

ورد البطـل والهنـدي
جنهم خستاوي وزهدي

المـخرج صفك بـايده
خـوش بـداية وجديده

هـذا الفلم عنتيـكي
نص هندي نص امريكي

لا بيـه قطار ولا خيل
وابطـاله ما بيهم حـيل

و ابـطالـه كلهـا جـواعه
عدهم لكن قناعه

و الفلم هوسه وتصنيف
لابيه حجي ولا تـأليف

بس احداثه بنص بغداد
وابطاله هندي و حـداد

والفلم نصه مترجم
والبـاقي اسـود واظلـم

هذي القصة قصة حب
لاع الواوي و لاع الدب

قصـة حـب فنطازية
بـين الحب و النازية

و القصـة قصة واحـد
بعده شريف وصامد

حـداد و جـان بايده
عايش عيشه سعــيدة

حب وحده وهي تحبه
صارت مزروعة بكلبه

حب وحدة من الرصافه
وهي تعجبت باوصافه

و البطل يـدري مفلس
وبـلكوه يريد يعرس

و البطـل عبد الزهرة
حـداد وقوته بظـهره

و ام البطل عـديله
وكـت المـغرب تدعيله

الله يوفقك يا وليدي
وتاخذ جــمبر بمريدي

وترجع للكاظم غانم
وتفتح علوه و مطاعم

عبد الزهرة شمحلاته
جنه ملك بــالتاته

و بيت البطل بالشعلة
معروف باصله وفعله

بيت اهله بالمدينة
وشارعـهم ممـبلطينه

بالكاظم عـنده جنبر
زغيروني بس مجعمر

صح عـنده جنبر لكن
راضي بقسمته ما من

و الجنبر يـم الصايغ
مسدود و دومة فارغ

و الصايـغ عبـد الواحد
سبحته ميه واحد

و يمهم حمزة الكببجي
و المطعم ماله يبجي

و بالمطعم كاعد شمخي
ع التمن دومه منخي

بـيته باب الدروازة
ومسواكه فريش وتازة

ذولـة البطل اصحابه
و اهل الكاظم احبابه

واصحابه يوم الشدة
توكـف تتحامى بسده

بـيوم الطبك توكفله
تطبخ قـيمة و تـهتفله

يـدرون بعبد الزهرة
ميدور كشخة و شهرة

فاتح للــوادم داره
و ميفوت يـوم زيارة

عنده الروحة للعباس
تسوة الدنية وتسوة الناس


ولوصلى بحضرة الحسين
جن زاير مكة مرتين

و بالـنجف روحه معلكة
مثل اليشتاق المكة

وطب المـخرج بالصايه
عباله عدنه قرايه

البـطل حـب بـنية
باخـلاص و حسن نيه

الـبنيه اسـمها سوزي
مشهورة باكل القوزي

كـلها الـبطل يا حلوة
انتي الكلب و الـجلوة

مـن شفتج يم التينـة
عبـالي بـطة سمينة

يــم التينه تلاكيـنه
ببسي وموطه بديــنه

بــس بــالنظره تحاجينه
نبرد ونكول حمينه

وع التينه كتبنه اسمج
وبس اسمي كتبته كبلج

ورسمنه صورة كلبين
واحد راهي واحد زين

تــعاهدنه ع الحب لكن
كلبج ما حرك ساكن

و ادري بكلبج مو خالي
مشغول بحب الغالي

و الـغالي فارس احلام
مشغول بحبج مينام

يا سوزي الفارس كذبة
ودروبه وعرة وصعبة

و اليـحلم يبـقى معـلك
يشبع غم ويشبع دك

كـتلج ع الحب نتواعد
و نكتب قصتنه بكاغد

و نـتشاوف كوليلي شلون
بمريدي بالشيراتون

و مـحد يكدر يمنعنه
مـادام الحـب يجمعنه

و حـبج يا سوزي كله
خليته بـنص الـسله

و ضـميته بالرازونه
خاف تلوحه البـزونة

حـبج نابت باعماقي
وبالكـلب ثابـت باقي

و كتــلج حبج خـلاني
بقـاصر اغـسل قـمصاني

و بيـتي الـبشعلة صبغتـه
وكرشي لأجلـج زغرته

و لأجلج كمت اركب تكسي
بدال الروبه اشرب بيبسي

و اد ري التــكسي يـكلفني
بـس بسرعة يوصلني

و مـا متعود الـبس قاط
جـني نايم جـوة كـماط

و كــلتلي عـمتي فـليحه
مـن اتـزين حـط ريحه

و جـوه الابـط علــموني
كلما احطه يشموني

و جنت اشـرب سومر كبلج
و من حبيتج كمت اعـلج

و كـبلج جنت اقـره هـوايه
و تبت و سلمت الـرايه

حبج يا ســوزي اعـجوبه
طلع كل كلبي عيوبه

كـلب الحـبج يم شـامه
امـن و اعـلن اسـلامه

كـبلج جنـت انـه مـدوهن
مـفلس و بجيبي كريفن

حـبج حقق احـلامي
و كمـت احجي بدادي و مامي

و كـمت البـس قاط و ربطه
و ابيدي شايـل جنطه

و بالعـلوه يــصيحولي استاد
و جني عنتر بن شداد

و شـخصيه صارت عندي
اقره و اكتب بـالهندي

و اتعلمت احجي فرنسي
والماني وتـركي و سي سي

يا سوزي احـلامي هوايه
بـس بيها اهداف و غايـه

احـلم نطـلع اني ويـاج
وحـدنه انـطب الارميتاج

و اللـوفر كـله انـزوره
و نشوفه صـوره بصوره

و بـحي سـوهـو نشوف الفن
شلون اطور و اتمدن

و نـقره روايات الـفولتير
و ازهار الشر البودلير

و نقره الكامـو والابسن
لـو نقره الكولن ولسن

و نسمع موسيقة الشوبرت
و جايكوفسكي لو كونسرت

واوبرا كارمن واوبرا عايده
كلهن حلوه وبيهن فايده

نـسمع و نـشوف و نقـره
ومنفوت مـنهن فقره

لـكن يـا سوزي الطلعه
بالعالم صارت بدعه

شـبيها البصره و العشار
وشط العرب ليل نهار

ساحر يزهي بـأشجاره
و طير المجر خطـاره

و دجـلة الـخالد يـا محلاه
ماكو شاعر ما غناه

و السـهله وشـط الكوفه
وزوار الغــر ضيوفه

و كتيـلي شوف حبيـب
لا تـصير هوايه طيب

جـابـر شيـخ العصابة
دز الامـي خطـابـة

و أمـي شـو جنها توافق
بفلوسه تـكلي صادق

و ادري بـامي طـماعه
تـاكل وتـكول جواعه

و ابـويه يـدري وعـمي
…. كـلها مـن امـي

امـي تريده و توده
ومـن يجي تبوسـه بـخده

و تـكلي هـذا فـلوسـه
يسـلمها كـلها ابـوسه

الـبطل كلها اشـكلتي
لامـج يـا بعـد عـمتي

كـالت حبيـت الـكرخي
يـا يمه و خش بـمخي

يـا يـمة و ادري و ميهم
نصرانية تحب مسلم

بـاجـر يـايـمة اسـتسلم
و مثلهم ابجي و الطم

و اتحجب و البس ربطه
وما اطلع و حدي بجنطه

الا ورجــلي ويـايـه
بـالبوشـي و بـالعبايه

امـها الخيــاطه كـالت
يـا يمه الشغله طالت

قصـتنه صارت طوبة
وسمعتنه صارت روبـة

جـابر مـا اظـنه يعوفج
يتمـنى ابيته يـشوفج

يتمـنى يشوفج خـانم
مستورة و عنـدج خـادم

مـن شـافج مرة تصعدين
بالتاته و جنتي تعلجين

تحـارش بيـج و عباله
حوريه جـنتي كبــاله

خشــيتي بعقله و انـتي
لـو حبج يكعـد بختي

يـحطج بكليـبه و يمـكن
وياكم يمكن اسـكن

يـا بنـيتي و جابر عنـده
امـلاك لحـد الـسده

يـا يمه و عـنده بـداره
بيكب دبـل قمـاره

و مـن يـطلع مـحبس بايده
وسياره عنده جديده

و قـندرته لازم تـلمع
والسبحـه بـايده تسـطع

عنـده مـعرض بـالنهضه
غير الذهب و الفضة

و شـوارب عـنده و لحيـه
وكل ليلة عدهم محيه

يتـغدى مـشوي ولازم
بـالعشى عشـرة عازم

و مـطلك كـبلج وحـدة
يـايمـه ولازم عـده

واولاده كـلهم عشـرة
ويـدرون بـامهم غبرة

وامـهم يـا يمة فطيرة
وما تدري شنهو الغيرة

وجـابر يا يمة بـقوته
مـاكل مـيراث اخوته

البنيـة كـالت يـمه
جـابر مـا عـنده ذمه

مـا اريـد يمـه الـجابر
لو درزن عنده قـنادر

جـابر يـا يمـه الارعن
خـلاني اكـل وأسمن

وانـي جنت ضعيفونه
وخصري خـصر بزونه

و جـابر يا يمه شحاله
يمشي ويـطرك بنـعاله

و يـاريته نعال اسفنجي
يسولف يا يمـه ويحجي

مـرة القـاضي ردتها
البنت القـاضي و سكتتها

كـالت سمـعيني وشوفي
يا يمه وقدري ظروفي

التـاخذ تـاخذ رجال
عنـده جاه وعنـده مـال

مـا تـاخذ واحد حافي
خابط يشرب موصافي

و مـا اظـن الوالد يرضه
يبدل ا لذهب بالفضه

الـمخرج كـام يـرافس
الـفلم كـلهم فـاكس

الــبنيه بــنت الـقاضي
كـالت ابويه راضي

راضيين بعبد الزهرة
ويـعجبنه حـاله و فكره

بـاجر يا يـمه ظـروفه
تتـغير بـاول لوفـه

يتـغير بـاجر و يصيـر
زنكين و يصعد ببعير

يكبر باحلامه وتكبر
احلامـه و تـصبح اكـثر

البـطل كـام يفكر
شلـون يخـطـط و يـدبر

اول شــغلة يـسويها
سـوزي بـكلبه يخليها

عنـها يدافع لو يدري
يحصب و يصيبه الجدري

يـدري بـاحـلامه جـبيره
لـكن قانع بحصيره

و بيت زغـير لـو كبه
ما بيها طرمـه و صبه

كـلتله شـوفه الدادي
بالمـسبح لو بـالـنادي

احـجيله وافتـح كلـبك
عن همي اشكيله وهمك

و اخـطبني مـنه و شوفه
بحجايـه عقـله تلوفه

وادري بـدادي ميمانـع
لـو شافك راضي وقانع

و انتظـرك بـاجر عـدنه
و تـقابل خـدامتنه

خـدامـتنه الـزنجيه
عقـلها يـعادل مــيه

كـلهـا الـبطل مـن
بـاجر اكشخ وجيكم طاير

الـمخرج كـلهـم فـدوه
هـذا فـلم لـو نـدوه

بـيت الـقاضي بـزيونه
عدهم صخـله وبزونه

و عـدهم بـالسطح عوعو
اول متشوفـه يهوهو

الـعوعو ابريـل اسـمه
واكـلاته زينه و دسمه

ابـريل اسمه وبـيه سوله
يفلت لو شاف صخوله

و اهل الـزبل ثابرهـم
واهـل الـغاز مـخبلهم

عـبد الـزهرة مـن شـافه
وكفت عنده الطوافه

دك الــباب و فــتحتله
خدامـتهم الـمعدله

كـلتله ادري شرايد
بـس احـجيلي و لا تـزايد

البـطل كـلها مـامي
سـوزي فـتاة احـلامي

و مـامي هـيه الخدامة
جنـها بيضة نـعامـه

تـطبخ مـركة باكله
جنها وحده مـن الـحلـة

كلتلة شوف وليـدي
ميفيـدك غيـر مـهيـدي

و مـهيدي ثـاري العمدة
وهـو اليوكف بالشدة

والبـطل يدري مهـيدي
دلال بسـوك مـريدي

كـلها ونــعم المشورة
وباجر لازم ازوره

الـعمده كـله اسمعني
يـا بو زهرة و افهمني

الـشغلة كـلها كلاوات
وما تنفع بيها العركات

نـصهم تـرة سـماجة
وبيهـم بيـاعة باجة

متفيدك غير الحـيله
يـا ابـو ايـد الطـويلة

باجـر بالكهوة اجمعهم
بجاي وحامض قشمرهم

و حـاول ويـاهم حـاول
ناور بالطوبة وناول

ولـو كـالوا عـنك لـوكي
وياهم العب توكي

الـبطل كـله اسـتادي
تـوك فـوخت افادي

الـمخرج كـلهم كـافي
صار الـفلم خـرافي

طـب الـبطل للـكهوة
و جابولة جاي و كهوة

و كـالولة الله بـالخـير
و ثلاثة صاحولة وير

و بالكهوة كاعد جابر
محزم بسـلاحه و حاضر

و كـلها الـعصابة الـتمت
وظل البطل يتلفت

صـارت ساعة بالسبعة
وما وصلو لسه ربعة

جـابر كـلهم عـوفوني
و بالعركة لا تلزموني

عـبد الـزهـرة سـواها
بليه ملـح خلاها

المخرج كام يكزكز
و ع البطل كامل يركز

البـطل كـله شـت اب
اطـلع بره و سد الباب

شيـخ العـصابة صـخن
ورث جكارة و دخن

كلهم ضربني بصدري
وشهد مصطاف و قدري

شـك راسـي بـالتوثيه
وخلاني امشي بعوجيه

البطل صك سنونه
وكام يرمش بعيونه

طلع من جيبه جكاره
وكلهم شوفولي جاره

مد أيده للكهوجي
وكله دخيلك حجي

ذولــة اكـبر هتـليه
ومـا درسـوا بـالكلية

الحـجي كله شبيدي
بـالعركه انـي جـريدي

الـبطل كـله شـمالك
شـايفني زوج كبالـك

الـحجي كله سوري
خـايف انضرب بـوري

لـكن شـنهو قـضيتك
يالله احجيلي و احجيلك

جابــر كله للحـجي
نعلعلـه ابيـه اليحـجي

كــله الـعصابه ذولـه
خلوني مـثل الثوله

اخـذوا صـاحبتي وراحوا
بين العشائر داحوا

كـالوله اسـكت وانجـب
وتاليها تصير معتب

احنه نـريد البـنيه
نـلعب عليـها شـويـه

الـبنيه جـنها صـوره
جـنها بطة مسحوره

والقائد اشتهاهـا
ويعجبه ينام وياها

لـو رايد سوزي فعـلن
بيت البشعـلة ترهن

وتنـطينه اختـك نـوشي
تخدم عدنه بلوشي

البـطل عـنده غيره
من جابو عرضه بسيره

اتحفى وشـد حـزامه
وطلع سـجينه و قامه

الـمخرج كـلهم يـابه
هـذا فـلم لـو غـابـه

الـبنيه كـالت يـابه
ذولـه جنـهـم سـلابـه

البنيه كامت ترجف
مـن كـامت كـلها تـهتـف

هـأي الليلة الموعوده
نـاكل مـوطه ام العـوده

الـقاضي كـام يطـكطك
بـسنونة و صدره ينتك

و شيـخ العـصابه قـرر
ها الليلة لازم يسكـر

و اتعشوا سوب و قوزي
وبالحفله ركصـت سوزي

بنـت الـقاضي المسكينه
سكروها وصارت طينه

خلـوها تـركص وتـهز
و كل ساعه تخرب وتفز

و القـاضـي سـاكت صـابر
سلم اموره الجابر

و جابر شـيخ العصابـه
و العـلوه كلهـا تـهابه

ما عنـده غـيره وذمه
و الســلطه هدرت دمه

الـقاضي كـلهم عيـني
انـي زيـكم نـصيري

يـوميـة بـالكنيسة
انــي و مـرتي انيسـه

عـوفوني وعـوفوا بنيتي
واخذوا حجول مريتي

وبين السكر و الصـحوة
جابر فز مـن الـغفوة

و للقاضي كله بسك
تسكت لـو افـتح كـرشك

الـمخرج سـد الشـاشـة
وشغـل مناوي باشا

بـنت الـقاضي من صاحت
اغمى عليها وطاحت

شـافت ابـوها امـدد
ومـا بـيه نفـس يتردد

و جــيت جـابر علـيها
وهـيه تـدافع بديها

كــلتله عـوف الزخمة
و بكلـبك خلي رحمه

كـلهـا نـزعي الدشداشه
و كـام يـعدل بفراشه

بــطرك الاتك خـلاها
تركض يركض وراهـا

نــيمها ونـام بصـفها
و اتــمنت كبر يلفها

لــو يجـفت عبد الزهرة
وسجينه ينغه بظهره

كــلتله مـعود بسك
فدوه اروح لقــندرتك

كـلتله اخـــذ فلوسي
و ازوجك عمتي بوسي

كـلهـا عمتج المخبله
يا هو اليخطبهـا تخبله

كــلتله عـوف طويزي
كـافي لـواكه و يـزي

و كـلتله اخـذ حـجولي
وكلاده ليـلو بطولي

و بســتان ابويه باسمي
و الورث كـه رسمي

وعندي محبس بي فيروز
يفيدك من تخسر وتعوز

كلها الشاطر وحده يفوز
وكلشي يجوز براوندوز

الــمخرج كله حراره
توكع و تعضك فــاره

الــبنيه كامت ترجف
مـن كام بشعره ينتف

هـــددها بـالسجينه
و صارت مثل العجينه

صـاحت يـابويه الحكلي
شيخ العصابه الهتلي

نـزعني وشك هدومي
يكلي كلش مـهضومي

يــغازلني بالبناني
وادري بـاصله سـوداني

هــــددها بعبد السادة
و تـكله دخيلك داده

عــبد السـادة يخرعني
من يلزمني يدغدغني

عبــد الســادة الشـقاوة
جفجير بأيدة وطاوه

عند شوارب متر ونص
ومشهور ينافق و يكص

عبـد السـاده الفيترجي
و محله باب الشرجي

ميـصلح بـس امريكي
وياباني وكوري وجيكي

و تصليحه كله كـلاوات
وميبدل بـس الجبنات

و لو كام الجوين كلــك
مزروف و يمكن ينشك

و عمال العنده شياطين
عمــر الواحد سبع سنين

المــخرج طـفه وعـزل
من شاف الفلم طول

جـــابر راد يقنعها
و يدري الـخجل مانعها

كــلها عقـلي و حبيني
ولاجـلج لا غير ديني

ولــو جيتي يـوم الداري
اكشفلج كل اسراري

واراويـــج العمــاره
لــخذتها بالشطاره

بيها شقق و دكاكين وبيها
اتـفاخر يــوم الدين

مــاجرها بــسر قفليه
و الاخذوهــا فيليه

و نـــطلع نفتر يوم
العيد

بالكيه ونشعل تبريد

و نــسافر نــطلع بـره
و العالم كلـه نفره

نتــغده يــوم بلندن
و مـن نطلع نفتر بالعن

و نتــعشه مره اباريس
لو نبقة بلندن و نخيس

وما راويج المتاحف
للـمتحف ما اطب حـالف

و مــنطب حفلة موسيقه
ما اصمخ بيها دقيقه

و لاتكليلي انطب مسرح
سنطه وبس واحـد يشرح

و يـمـكن نـكلب لامريكه
ندرس غش وفبريكه

لـو نعــبر بالتـيتانيك
وانلعبه نكله انتانيك

مـن نرجع نركب وياك
ويمكن ترجع لو ننساك

المخرج كام يغلس
بكل لقطة كام ينعس

من نرجع كلها اوعدج
نسجل امـلاكي باسمج

عندي بيـت بحي دراغ
هستوه مكمله الصباغ

و بــحيفه عندي شقه
ومسرح تجـاري وفرقه

و بــالاردن عنـدي مكتب
كلش حلو ومرتب

وعندي مكتب استيــراد
بالبصره ومثله ابغداد

وعــندي مطعم بالمسبح
ما أدري يخسر يربح

وعندي معرض سيارات
مخصص بس للتكسيات

وعندي مــحل قنادر
بيه طبكه وبيـه ستائر

و عنــدي معمل نجاره
ناوين نــكلبه عطاره

وعندي محل تسجيــلات
عادي يبيع و سيديات

وبــحي العامل عندي
كشك زغـير على كدي

وجنــبر عندي بالـبياع
واربع كهاوي وركاع

وعنــدي مخبز بالدوره
وبنجرجي بسوك العوره

وعنــدي علوة بجميله
مطلعه المصرف بالحيله

وعــندي معمل حلويات
ميفتح بـس عصريات

وعنـدي بيت بذاك الصوب
وبيت كباله بهذا الصوب

بيـت زغير ومجكنم
والثاني مســويه مطـعم

وعنــدي معمل فانيلات
يطلع من يوكف حلفات

و عنـدي معمل قمر الدين
يصدر للبصره وللصين

وعنــدي مطعم مشويات
بالهوسه يقدم لفات

المخــرج كام يــفتل
مـن شافــه كام يفيل

و مفــكر افتح مصرف
و مجلس اداره مـصلف

و افتح مــكتب انترنيت
بيــه حمام وبيه تواليت

و مفــكر افتح كلية
تخرج قــفاصه و هـتليه

و بنفسي اطلع دكتور
كــدام اسمي الدي محفور

ويعجبني من اكعد احجي
تضحك كلها و محد يبجي

كــل هذا وانت تامــرين
كـدامج بـس تكولين

صــار ومــا عندي مانع
اعقل وابنيلـج جامع

المــخرج طلعت روحه
هالفــلم عوزه ملوحـه

المــخرج كام يغـلس
بكـل لقطــه كام ينعس

البــطل شـاف الشغله
كــلش صعبه موسهله

لــو جيـت وحده يكتلوه
و بين الذيابه يشمروه

و فكـر منهو اللـي يعينه
حتى يخلص المسكينه

و فجــاة سمـعله هـزة
ولنـه صديقه مرزه

كــله شـجابك يا خويه
وصابغ وجهك بالبويه

كــله جيـتك للعونه
دزني المخرج بالمونه

كـله تـطبك ويـايه
و البسـك جـبه و صايه

و كـله خـو الله جابك
اثبت و اربطلي حزامك

نـزلوا هـوه و الـهندي
بـيدهم قامه و مردي

واحد صعد ع الشجرة
و الثـاني خـشـله بحفره

الـــبطل صار يعاين
بـس المـوقف موباين

شـاف الجماعه مطشره
وبـيهم اكثر من عشره

واحدهم صـاير طنطل
بـالكوة بروحه يسحل

و خـلاهم لمـن صاروا
اخـر ربـعيه داروا

البـــطل شـاف الوادم
كلهم اهــل جرائم

ميهمهم غير الونسه
لو جانت و صخه و نجسـه

ومتهمهم اعراض الناس
وما عدهم غيره واحساس


خــلاهم لـمن نـاموا
و بـالحلم يمـكن هاموا

وزحفوا هوه وصديقه
وكـلمن يـعرف طـريقه

المـخرج قـرر يشلع
كلهم فد ساعه و ارجـع

شــافوهم كلهــم نيام
بالجوله وجنهم اصـنام

شــدوا ايديهم بحبال
ومـا عافوا منهم رجـال

والقاضـي فكـوا ايده
وشـافوه صاير وينيـده
وبـالخيمه شافوا سوزي
تكركط بـالنيمندوزي

ويـم سوزي كاعد جابر
يقشمرها بشربت نادر

طلعـوها و طلـعوا بره
وجابر طلعوه بالدفره

شـافت ابوها مدمه
وحـوله الــزلم ملتمـه

كلتله يابه احكمهم
بـاول جلسه واحــبسهم

وبـين الهرج و الهوسه
انطت للبـطل بوسه

والبـطل كام يمطك
ع البوسه وكلبه يطكطـك

و الـهندي كام يهلهل
طالع ناجح مـو مكـمل

و جابر شيـخ الجماعه
ضاعت تاليها اطماعـه

بحزامه رجع سـيفه
و طلع صابونه ولـيفـه

و اتـحضر كلهم يمـكن
بالسجن كـلنه نعـفن

والبطل هـوه وسوزي
تبوسه ويكلها جـوزي

وسوزي مكيفه وممصدكه
زفوها بهوسه وصفكه

زفـوها العـبد الزهـرة
وطلعت وياه منتصرة

و حـطت أيـديها بايده
و عاشوا عيشة سعيده

وصاح المخرج بيهم هوب
بالجلفي ومعناها
Stop

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *