يالعرست هذا اليوم

يالعرست هذا اليوم صدك ابد ما تندم
هيه عليك تعلمت وانته عليها معلم
جانت اميرة مدللـه وبس بيها دومك تحلم
هذا الحلم من أوله لغيرك ابد ما يرهم
والحلم انته اتحققه وما اظن عليه تتندم
يا نادية كبلج جنت جلمة غريبة بمعجم
بالفندق انسى رويحتي لو انسى روحي بمطعم
ريوك ما عندي الصبح واكضيها جاي وبقصم
وجان العشه لو مخلمة لو بيض اكولن اسلم
البوي اكله نص شوي يلعبني تالي بشلغم
حتى الفلافل طنكرت صارت علي تتجقم
كمت احلم بمركه ولحم وتمن اريده ملغم
جنت احلم اباجة الصبح وبالسمج كمت اتحلم
وشربت بيرة وبطلت ع الشرب خفت اتعلم
وادري الشرب بيه لذات وذنوبه هم ما ترحم
واتعلمت ع التدخين وما عفته رغم البلغم
لازك بصدري وما خفت ينفجر صدري ويظلم
ولا اتحارشت ببنيات ولا جنت بيهن مغرم
ولا تواعدت بالسينما ولا عزمت وحدة بمطعم
ولا بست وحده ولا كلت اني بجمالج مغرم
بلبل اصير وي الزلم ويه البنات اتلعثم
مخلوق الله مصممه للونسه هو مصمم
الزلم تطلع للشغل واتكافح وتتحزم
وهيه العليها امددة لو نفسه لو تتوحم
المشمش تريده الشتا وبالصيف تطلب شلغم
وان جانت ايدك موالك طيب ودوم مهندم
مثل الدجاجة تصير الك وطول الوكت تتبسم
وتطلعلك ابطرك الاتك ولباس لنكه مقلم
وان جان كلبك من صخر وايدك ابد ما ترحم
توكفلك براس الفرع تضرب رصاص و دمدم
عطشان دوم تخليك ولو جان يمك زمزم
وتجيش جيوش العدا وعدها العطر من منشم
ولو كلت مرة معودين شوفولي جاره الترهم
لا مريم تريد الصلح ولا اني رايد مريم
تضحك عليك الماجدة تمشي وتكلك تشكم
صدكيني كبلج ما شفت غير القهر ضكت وهم
جنت اشرب الماي الصبح ع الريك يتحول دم
وجان الاكل كبلج زهر بكل وجبه لازم انسم
وتعودت ع التفكير وكل فكرة عبالك يم
الجروح كلها تناثرت وما نفع وياها اللم
وجروحي جانت كل وكت بكليبي تحفر منجم
جرحي النزف كبلج ابد لاخجل مني ولا اهتم
لجروحي صرتي انتي الدوا وصرتي علاج ومرهم
مهموم خلاني الوكت والكلب خالي واظلم
وامفارس اني ويه الوكت ورغم القهر اتبسم
جان العمر كبلج خرط كضيته كله اتألم
يوميه ياخذني الحزن ويوميه جني بمأتم
بالليل وبعز الشتا احلم وغيري يحلم
خاتم اشوفج بأصبعي وسوار اصير بمعصم
ونصير روحين بجسد وميفكنه حته الطلسم
اني زرعت بذرت عشك واحنه الحصدنه المغنم
من خذتج اني تعدلت كمت البس واتهندم
كبلج جنت مثل الكفر ومن شافج امن واسلم
ايامي بيج اتنورت وصارت زهيه وأرحم

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *