قصيدة قيم الركاع من ديرة عفج – الشاعر سامي عبد المنعم

http://www.youtube.com/watch?v=tPFHCi0Kebs

قيم الرگاع من هاي اللحه
اتشوفه هيبه وعنده لحيه امسرحه
يشتم ابلا خجل وبلا مستحه
من ايحس المقعد اشويه اندحچ
قيم الرگاع من ديرة عفچ

برلمان اهل المحابس والمدس
عگب ماچانوا يدورون الفلس
هسه هم يرتشي وهم يختلس
ولو نقص من راتبه سنت انعقچ
قيم الرگاع من ديرة عفچ

اتشوف واحدهم امعگل بالوقار
وبالاصل تاريخه اسود كله عار
ابضرف ثلث اسنين مليونير صار
ايريد عالوادم ايعبرله چلچ
قيم الرگاع من ديرة عفچ

گمت ما اعرف حماها امن الرجل
ياهو التكضه اهو ايمثل العدل
وگمنه نستورد الشلغم والفجل
لان كلها ضلت اتدور ودچ
قيم الرگاع من ديرة عفچ
>
والله ضيعنه الصدگ من الچذب
اتشوفه هيبه وحچيه المصفط عذب
ياخذك وايردك ابشرق وغرب
وبسچاچينه يدچك
حيل دچ
قيم الرگاع من د يرة عفچ

حيل دوخني الحچي الماله ربط
وصار عندي سكر وحصبه وضغط
نفترش عاگول ونتغطه ابحسچ
قیم الرگاع من ديرة عفچ

گمت ما اميز الذيب امن الحمل
امنين ما التفت گلبي يشتعل
انه ما شايف شعب يتبع خبل
شاب راسي وتيهت كل السچچ
قيم الرگاع من ديرة عفچ

يا حكومتنه الرشيده ام الوقار
الفساد المالي عنوان الچ صار
ندري جابوكم ابدبابه وقطار
ليش ضليتوا سمچ ياكل سمچ
قيم الرگاع من ديرة عفچ

لازم انميز الزين امن الزلم
وننتخب كلمن شهم صاحب علم
ونرفض اللي يجي كل يوم ابفلم
من ايشوف المنصب اشويه
اندرچ
قيم الرگاع من ديرة عفچ

2 تعليق

  1. سامي عبد المنعم 14 أبريل، 2013 / 8:47 م

    الاستاذ علاء العبادي
    السلام عليكم
    اود ان الفت نظركم ان قصيدة قيم الرگاع من ديرة عفچ هي قصيدتي
    وليس لها اي علاقة بالملا عبود الكرخي ويمكنكم مراجعة ديوان الملا
    عبود للتاكد من ذلك علما انها تحتوي على مفاهيم واحداث لم تكن
    موجودة في ذلك الزمن وهي مسجلة بصوتي على اليوتوب
    ارجو تصحيح هذا الاشكال ولكم جزيل الشكر والاحترام
    اخوكم
    الشاعر سامي عبد المنعم

    • علاء العبادي 19 أبريل، 2013 / 10:27 م

      اشكرك اخي الكريم الاستاذ سامي عبد المنعم على هذا التوضيح وانا اسف جدا على هذا اللبس غير المقصود
      الان صححت الامر واضفت مشاركتكم في اليوتيوب ووضعت اسمكم بدلا من اسم عبود الكرخي
      ارجو ان تقبلوا اعتذاري مجددا مؤكدا لكم اعجابي الشديد بقصيدتكم الرائعه التي استمتعت بها كثيرا وانا استمع اليها بصوتك العراقي الاصيل واحساسك الصابر الجميل متعك الله بالصحه والعافيه ولك مني كل المحبة والود

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *