فقط في العراق

روائح العراق ..احد عشر رائحة توجد فقط في العراق
   
   
أولا: الخليط بين رائحة السمك المسكوف و رائحة الشط في أول ساعات المساء.
                 

 ثانيا: رائحة الصمون الحجري المكسّب (مستحيل توصل للبيت كاملة، الكماعة تطير لو يجي القبيس!).
   

ثالثا: رائحة حدائق البيوت بما فيها من راسقي و شبوي ليلي و قداح و روز دموي و قرنفل و حلك السبع وأشجار نارنج، و مرّات حتى الخيار التعروزي بالسواكي. و طبع لازم الياس عالأطراف!
    

رابعا: رائحة العاكول الرطب، خاصة في الطرق الخارجية. و إذا كان السفر شمالا فيضاف اليها رائحة بطيخ سامراء (أحلى من العسل).
    

خامسا: رائحة خليط الغداوات العراقية ذات الروائح المميز الخارقة الحارقة تفوح من الشبابيك مثل: بامية مع تمن عنبر و عكوس لحم غنم، تمن باكلة و شبنت، تمن جما لو تمن كلم الخ الخ
                      

سادسا: رائحة الباسطرمة (مال موصل) وية بيض، ريوك يوم الجمعة. أويلي يابة! صدك رحمه الله والديه اللي اخترعهه للباسطرمة، ينرادله جائزة نوبل!.

سابعا: رائحة البخور المختلط مع رائحة ماء الورد في المراقد المقدسة. تحس أنه الدعاء يصعد گبل.
           

ثامنا: رائحة عرباين اللبلبي الحار بالشتاء…
     
أو الباگلا و بطنچ، لو شلغم و دبس. (خاصة اذا كانت قرب البارات الشعبية و يخبط وياهه ريحة الزحلاوي و أغاني يوسف عمر) !
            

تاسعا: رائحة مقاهي الرجال و تجي منها ريحة النراجيل (تتن سدّة الهندية، مو ام النكهات و الفواكه مال تالي وكت) ..
   
و شاي ابو الهيل عالفحم، ووياههة صوت الزار و ضرب بولات الطاولي و الدومنة عالميوزة و أم كلثوم.
          

عاشرا: رائحة صابون غار الحسني و غار العيسى مع ماء السخان النفطي، و الليفة اللي تشيل طبقة الجلد.
                 
حادي عشر: ر ائحة الكستانة المخلوطة مع الصوبة العلاء الدين خاصة اذا الشعلة مو كلش زركة.

عطرة انت يا رائحة العراق، قبل أن تتلوثي بعبق البارود و دخان المولّدات و سواقي السيان الراكد ، والأسوأ من كل ذلك هو نتن المارقين.
المصدر:شلش عراقي

مشاهد عراقية في طريقها للزوال

١- تغطية التلفزيون بجرجف حتى لا ينشل ويستبرد .

٢- كلاص خاص لرب العائلة ريحته يانسون ومحدد من جوه !!!
٣- وجود المغسلة بصف باب الطهارة ،، وبيها جرجف بلاستك مشجر داير حبل وصابونة رگي صايره ورقة !!
٤- الاوجاغ متغير لونه من الابيض الى البرونزي من طفار الدهن من الطاوه !!!
٥- مزهرية بنص ميز الاكل بيها ورد جوري اصطناعي وامام الميز لوحة ستل لايف مال شيف ركي وعنكود عنب وخوخاية وتفاحة وبطل واين ،، چانت قبغ مال قوطية نستلة مال بسكولاته !!!
٦- جلب صغير لعابه ،، يم جامة السيارة الوره يهز رگبه بالطسات من تمشي السيارة !!
٧- فرو احمر على دشبول السيارة منكب من جمرات الجكارة !!!
٨- عمل الطهارة او بيت الادب او الخلاء جوه الدرج ،، وبمساحة ٩٠ سم مربع ،، ماخذ منه ٣٠ سم مربع البريك والمزمبلة !!
٩- صورة لرب العائلة وزوجته مال زواجهم معلگه بنص الهول ،، يگابلها الرجال بالليل ويشرب ويبجي !!!
١٠- بطل اسفنيك جوه الدرج ،، وبايسكلات ام تلاث چروخ وقعادة وقنادر وبوابيج عتك !!!
١١- قواطي مال حليب كيكوز بالثلاجة مليانه مي ،، وريحتها بيض لان الجهال شربوا بيها مي گبل ميغسلون حلگهم !!! ووحدة بالفريزر حتى تجمد لاستعمالات رب الاسرة في الهابي اور !!
١٢- مبردة بليه طوافة والمي يخرخر للشارع !!
١٣- صورة لمن يحكم البلد تتبدل تلقائيا ويه تغيير النظام والشخص !!!
١٤- غسالة سيمنس فوكاها چرچف ومزهرية وطاولي !!!
١٥- طمغة مال نعال ابو الاصبع على حايط الهول !!
١٦- ابو بريص بالسگف يم الرازونة ،، ديتفرج من فوگ على متحف اللوڤر !!! .
١٧- صناديق بوش مال ببسي وفريدة وتايرات عتك وجاملغ مال انگليا بالسطح !!
١٨- شيشة مال طرشي شلغم عتيك مكطن ، بالرازونة مال المطبخ !!
١٩- دفتر رسم مال ابو البيت من چان صغير ،، بيه شمس دتضحك واشجار وبلم ،، على اساس لوحة لبيكاسو !!
٢٠- بكرات لفريد الاطرش وام كلثوم ومسجل فيليبس يعلس ، في گبة الخطار بالركن الهادئ منها !!
٢١- ردن بجامة بازة عتيكه ،، صايرة وصلة مال مسح طوز مسينه !!
٢٢- كتلي وقوري مفعصه على الطباخ !!
٢٣- شيشة ريحة منين خضرة وشيشة بريل كريم على المراية فوك المغسلة ،، مع مشط مليان گشره !!
٢٤- لباس مال جاهل ساد البلوعة والبلوعة مطوفة !!!
٢٥- راديو گروندنك ابو اللمبات يخرخش !!
٢٦- تلفون انكليزي أسود ودليل تلفونات طايره نص اوراقه !!!
٢٧- لعابه بلية ايدين ورجلين بنص المطبخ !!
٢٨- صوبة علاء الدين قبغها صاير أسود من تفال الجهال !!

شواطيء الاعظمية

الاعظمية 
اسماء الشواطي فيها كما يلي: – 
1. شط القلغ(اي الشرطه)

2. شط المله(نسبة الى مله عبدالله الله يرحمه) 
3. شط القية وهو في محلة الحارة بالقرب من بيتي
4. سن الفيل 
5.جسر الاعظمية الحديث(جسر الأئمة) .
6شط البلامة او الشريعة وهو في محلة الحارة ايضا”
7.سن الاسد مع سنون متفرقة وهي خطره في الصيف 
8.ثم يأتي شط أو سن الباشا الذي يقم على حافة الشط وهو مرتفع ويصل ارتغاعه الى 4 أمتار.. 
9. بعده ياتي شط البصية وهذه كلها في محلة النصة ثم تأتي منطقة الصخر وبعدها تأتي 
10.مسناية بلاسم الياسين وهو أحد شيوخ الكوت وبناها عام 1957م وبعدها يأتي 
11.مسناية قصر حكمت سليمان
حيث يبدأ منها السباق السنوي لبطولة العراق في السباحة وينتهي الى المسناية التي ذكرناها في البداية والتي يسميها أهل السفينه بمسناية الجسر ..

ملخص استفتاء كردستان العراق

Ali N Dhaher
ملخص احداث الاستفتاء شارك في النشر فالامر مهم جدا! اولا : صوت البرلمان العراقي على ابطال شرعية الاستفتاء الذي ينوي مسعود البرزاني القيام به, وهذا القرار ملزم وفيه فوائد قانونية وهي: 1- لايحق لاي دولة او منظمة عالمية من امم متحدة ومجلس امن وغيرها, ان تتعامل او تعترف بشرعية الاستفتاء وما يترتب عليه 2- يحق للحكومة العراقية والشعب العراقي الرد باي نوع من انواع الرد, اقتصاديا وسياسيا وحتى عسكريا , وما يقال ان الحكومة العراقية وقعت وثقية سرية مع الامريكا عام 2011 قبل انسحابهم بعدم استخدام العمل العسكري المسلح من الحكومة الاتحادية ضد الاقليم نعم توجد هكذا وثيقة ,لكن في حال اخل الاقليم ببنودالدستور العراقي وعرضوا الدولة العراقية الى الخطر وخالفوا الدستور, او قاموا بامر تامري فانه يحق للعراق الرد, وان الشعب العراقي يحق له الدفاع عن ارضه وسيادته وفق القانون العراقي. ثانيا : فيما يخص رئيس الجمهورية فواد معصوم والذي لم يبد الى الان اي اعتراض على مخالفة مسعود للدستورالعراقي وتوجهه الى تقسيم العراق خلاف ما يقره الدستور من ان العراق بلد اتحادي فيدرالي بهذا يمكن اعتبار السيد معصوم قد حنث باليمين ويمكن اتخاذ حق المسائلة بحقه طبقا للمادة (61/سادسا/الف) ,بان يكون الطلب بالاغلبية اي بعدد(165) نائب ,ويمكن ان يتم اعفائه من المنصب بعد ادانته من المحكمة الاتحادية حال ثبت انه حنث باليمين واخل في حماية الدستور العراقي ثالثا : من خلال متابعاتنا فان اغلب القوى السياسية العراقية رفضت الاستفتاء ثالثا : القوى الكردية غير متفقة بخصوص موقفها من الاستفتاء موقف الاحزاب الكردية لغاية الساعة, ويمكن اجمال موقف الاحزاب الكردية على النحو التالي : 1- حركة التغيير : معارض للاستفتاء بشدة ويطالب بمايلي: أ‌- باعادة تفعيل برلمان كردستان ب‌- ضمان انتخابات جديدة لتحديد رئاسة الاقليم ت‌- تغيير الدستور بما يضمن عدم التلاعب فيه بخصوص منصب رئيس الجمهورية ث‌- البرلمان الاقليم هو من يتولى الاستفتاء لاحقا 2- الاتحاد الديمقراطي الكردستاني: يشترط نفس شروط قائمة التغييرالا انه يقترح اعادة العمل البرلماني الكردي ثم الشروع في النقاط الاخرى باستثناء اربع شخصيات كردية منسجمة مع مسعود، والذي يقود المعارضة على الاستفتاء هو أسرة الطالباني اما جناح كوسرت ومحافظ أربيل فهو مع الاستفتاء ومعهم شخصيات بارزة وبرهم صالح يمثل الوسط 3- الجماعة الاسلامية: نفس موقف التغيير 4- الاتحاد الاسلامي : نفس موقف التغيير، لكن يوجد تراجع في موقفهم وبهذا يتاكد للجميع ان المندفع نحو الاستفتاء هو مسعود بامر من اسرائيل والامارات والاردن والسعودية واماامريكا ففيها خطان احدهما يويد الانفصال والاخر يخشى من النتائج ويطلب التريث 5 – موقف المواطنون الكورد خارج اطار الاقليم سواء كانوا في المحافظات الجنوبية او الوسطى وفي بغداد ( الكورد السنة والكورد الشيعة ( الفيليين) كلهم يرفضون الاستفتاء كون الامر مجرد صراع ومكسب سياسي وغاية الصراع خلق نزاع دموي بين ابناء الشعب الواحد المتعايش معا بسلام وامان. 6 – المواطنون في السليمانية هم الرافضون الاوائل للاستفتاء وهم اول من اسس حركة(لا )او(نه خير) وخرجوا لتظاهرات ترفض اجراء الاستفتاء. شارك في النشر لكي تتضح الحقيقة لكل مواطن شريف لا يريد جر العراق لويلات الحرب بين ابناء الشعب الواحد ودماء ابنائنا لم تجف للان في حربهم ضدالارهاب وداعش اللهم اني بلغت اللهم فأشهد ؛ التوقيع مواطن عراقي

الغيرة العراقية

Image may contain: 1 person

 

الغيرة العراقية ايام زمان

*********************

الله يرحم نجم عبد عذاب سولفلي سالفة وگال سنة 83 چنت جندي وصنفي سايق بالجيش وبهذاك اليوم صار علينه هجوم ايراني قوي بمنطقة الفكة بالعمارة وصار قصف المدفعية الثقيلة يشوت ويطيح بالخلفي وبذيج الفتره چان صدام وربعه ياخذون اللوريات تحمل عتاد وصواريخ خاوه وبالگوه من الأهالي المدنيين وغصبا على أبو اللوري يوصل للجبهة تحت عنوان المجهود الحربي.

يگول احنه لابدين بالخنادق والشقوق الأرضية خايفين من القصف لان القذيفه تجي تون وتصيح نجف نجف نجف يعني موت مابيها يمه ارحميني

وبين مااحنه لابدين اجه مارسيدس اقجم سكس ويل مفرغ عتاد بالمتقدم وراجع ولما وصل شويه عنا ولن قذيفة 105 ملم طاحت وراه وملخت بدي اللوري والتايرات ثمانيتهن الوره طگن والسايق نزل مرعوب مايعرف وين يلبد لان الگاع مكشوفة

يگول نجم الله يرحمه صحت عليه طفي السياره وتعال بسرعه لا تموت

يگول اجه يركض المسكين وينفت لان ماشايف قصف وچان بحدود عمر 22 سنة ولابس دشداشة دليمية ولاف يشماغ أحمر على راسه

گتله لاتخاف وهسا الله يفرجها

گال أخاف ع السياره خاف تحترگ وابوي يذبحني لان عزيزه عنده وعيشتنا بيها

گتله وين أهلك

گال بالرمادي

لا تخاف واحنه عمامك اني سماوتلي وهذا بصراوي وذاك حلاوي

وگاعد انهدي بي واچت القذيفه تصوفر واحنه ياعلي ياعلي ياعلي وهوه من خوفه المسكين هم صاح ويانه ياعلي،،،،

انتهى القصف وصار الليل وابن الرمادي خايف

يگول نجم الله يرحمه گتله الصباح رباح وطلعت طماطه وبتيته وسوينه عشه ونام يمنه ابن الرمادي

ومن الفجر غبشت لمساعد امر السريه وسولفت السالفة وگتله سيدي هذا من الرمادي وهيج صار بي

کال مساعد امر السرية

نجم ماعدنه تايرات منين نجيبله

گتله سيدي عدنا مستعملات انطيني امر اخذهن

گال روح نجم شوف شغلك وسوي اليعجبك

يگول طلعت اللاندكروز وحملت التايرات ورحت للسياره فتحت التايرات المضروبات وأخذت الويلات والسفايف ونزلت لأقرب بنجرجي وسويتهن ورجعت شديتهن وابن الرمادي اجه گال عمي خلي اعاونك گتله روح اتريگ معليك،،،،

كملت وخميت الدهن والماي وشغلت حتى الهوه يصعد ورجعت گتله يلا عمي توكل وروح لاهلك،،،،

تشكر هواي من عدنه وگال عمي هذه رقم تلفون بيتنه بالرمادي خاف فد يوم عندك شغله بالرمادي تصير بس اتصل بينا،،،

راحت سنين وردت سنين يگول نجم من أنزل باجازه اشتغل بالاجازه بسياره عزيوي أبو سعد الله يرحمه وبذلك اليوم حملنه أربع سكسات غنم للرطبه وصارت عجه قوية وتيهت ربعي ونزلت على سيطرة مال الأمن الخاص ولزموني بحجة تهريب الأغنام وذولاك مايتفاهمون بسرعه للأمن الاقتصادي وحولوني لمركز شرطة الرمادي والأوراق يردون يحولوها للقاضي وباجر المحكمة وراح انحكم أقل شي خمس سنوات وسيارة عزيوي تصادر مابيها كل مجال،،،

يگول نجم الله يرحمه العصر بالسجن گاعد وانخه أم البنين سلام الله عليها وذكرت أبو الرمادي النقذته قبل 4 سنوات واطلع المحفظة وادور بالأرقام ولگيت الرقم

گلت للحرس أبو الغيره بس أريد اتصل رحمه لوالديك

طلعه الحرس واتصل بالأرضي وحصلهم

وعرفهم بنفسه گاله انته وين هسا

بس گلي واحنه جاينك،،،

يگول نجم بقيت اسولف وي الحرس بحدود ربع ساعه ولن تطبگ مارسيدس تورن وتنزل الزلم ركض شي لابسه غتر وعگل وشي افنديه وشي لابسه زيتوني

وذاك الشاب ابن الرمادي الخلصته من الموت شبگني وكلهم باسوني ولما اجه ضابط المركز تعجب منين أعرفهم لان وياهم واحد برتبة لواء متقاعد خال الولد الخلصته وكل شويه طابگه سياره وانگلب المركز عليه،،،،

الأوراق شگگهها الضابط من سمع احساني وي ابن ولايتهم وطلعو السياره بحملها واخذوني للبيت وذيج العزوبية وابات يمهم ذيج الليلة وكل عمامهم اجو

هوه هذا السماوتلي الخلص ابنه وجميله ماينسي وصار الصبح ودعوني وذاك الريوك وحطو غراض بالسياره وگالو لاهلك ذني والولد انطاني جيس وگال عليك الله لاتفتحه لما توصل لهلك لان هذه الجيس بي هديه من امي

ولما وصلت يگول نجم لگيت بالجيس 150 دينار وشكبرها بذاك الوكت

 

الله يرحم نجم أبو علي ويرحم كل الناس الطيبة