نشيد النعيم

نشيد النعيم

 

00000

 

احنه النعيم احنه   مانقبل المنه

الناس تحسدنا

تحسد مسيرتنا

لانه سيرتنا مابيها كل عيبه

من الموصل وزاخو للبصره والسيبه

صفحتنا مو سوده بيضه وابد تنصع

والسيره محموده يوم القهر تنفع

من اليمن جبناها وبالعزه صناها

جيلا بعد جيل

النعمان علاها وللعرب خلاها

تكتب مواويل

بتاريخنا تحجي البشر وشيوخنا كلهم فخر

الكرم شيمتنه

شمحلاها لمتنه

بدار النعيم الماطفت ناره وخلت داره

بدار النعيم اتجمعت والتقت زواره

ع الطيبه والخوه

واحنه اهل نخوه

بديوانه تلكه الوفه والرايه بيه مرفرفه

 بالشرف والعزه

والعزه عنوان

ترفع الانسان

للمجد والقمه

وما تبطل الهمه

وظل النيعمي من الازل تاريخه امجاد

اسياد كلهم والشرف يصنع الاسياد

وكت الظلم وله

وصار الوكت فله

صورتنه مرسومه

والشهره معلومه

وماعدنه مظلومه

تشتكي ومظلوم

دوم بفخر دوم

لوضاكت الدنيه بالبشر والبشر جاعت

ولايبقى خير ولاثمر والذمه راحت

والناس كلها مشتته شو جنها ضاعت

لاجنها شافت خير ابد وشبعت ونامت

تلكه النعيمي للفرح فاتح ابوابه

وابوابه كلها مشرعه تنطر احبابه

والرايه منصوبه

والكهوه مصبوبه

والشيخ كاعد بالصدر يتامل الناس

يسال على زيد وعمر وعن علي وعباس

مشكلتك انت هينه والحجه بيها مبينه

وانت قضيتك لاباس

هاتوا القلم والقرطاس

اقضي بكتاب الله

مفتاح كل عله

الحكم عدنه القران

بيه العدل والفرقان

والسيره سيره مشرفه سيرة نبينه

احمد حبيبي المصطفى والنهج دينه

 

 

النعمان هو الجد الاعلى لعشيرة النعيم وقد اخذت اسمها منه حيث النعيم هي مصغر لكلمة نعمان

واصلهم من اليمن

 

 

 

علاء العبادي

الاول من اذار 2012

ارد اهج من العراق


ارد اهج من العراق واسكن باخر بلد
لاافكر بالحبيبة ولا افكر بالولد

الحبيبه تكلي روح هاجر ولاترد بعد
روح فكر بالصبايا طنش وعيش برغد

الحبيبة تكلي روح
البلد مابيها روح
شعندك مجلب بعد


روح عيش باي مكان
بلكي تشعر بالامان

وتلكه بالخارج سند

روح هج من العراق
ولاتفكر بالرفاق
فكر بغيده ورغد


تدري انته البلد ضاع
من صفه بحلك الضباع
والوضع صاير هدد










من حال الحال

الله بحكمته وقدرته يغيرنه من حال الحال
والدنيه ما أظل ها الشكل يوميه نفس الموال
كاضيها بالهم والقهر وناكل على كد الحال
والناس من كثر البطر ملتهيه بالقيل وقال
كل همها هذي أطلكت وتزوجت عبد العال
زنكين أبوها وتشتغل واذب لكط للرجال
والزلم تركض والمهم عدهم طموح وآمال
هم يشتهي يركب شبح وميهمه يطلع محتال
وأولاده كلها أتعلمت ع الصرف ما دام المال
ما بيه تعب لو بيه تعب ما كعد منهم بطال
لا أظن تعبنا ينتهي ويضيع ويه الأطفال
التعب ميهم مادام الولد طلعو عقال
ومادام بيهم تفتخر وعاقد عليهم آمال
وعندك ظهر ماينحني كبال الألم والأهوال
صدكني لوضكت التعب التعب يتحول مال
تدري الزلم لوما الظهر ماكدرت تهد جبال
ولا تشيل هم الباجر عوفه المهم صافي البال
وكل مشكله والها حل مادام ربك حلال
ولو جنت ما عندك فلس ولوجنت حافي وحمال
مادام عندك جم ولد باجر يصيرون رجال
شوف الأسود التفترس بالأمس جانت أشبال
ترضع وهي مغمضه وتدري الأسد ما ينكال
باجر يصيرولك سند لوكبروا وصاروا عال
وحزام يصيرون وبعد براسك يصيرون عكال
دكتور هذا يصير ألك وعياده عنده ورسمال
ع الأدب انته معلمه وبأخلاقه يشفي الأطفال
والثاني خلص هندسه وسياره عنده وأموال
يبنيلك البيت ويسد بابك أذا ضاك الحال
ويدرون ثالثهم كلب وأسمه انكتب بالدلال
حبيته من شفته وكمت اكتبله شعر وأزجال
وتعلمت كلما يجي اقراله قصه وموال
ولو صخنت واستبردت استقبله وبطني اسهال
بفراشي يبقه للصبح لوخره بفراشي وبال
والرابع الله يسلمه وبيد الله كل الآجال
تنذر إذا عاش وسلم مسلم تسميه بالحال
واني الأسمي الخامس والعم يسمي موخال
ام البنين ومشتهي هذا الأسم من اجيال
خمسه واذا بعدك كوي من الأسم عندي اشكال
كلهم أذا ضاك الوكت لابد يقدرون الحال
صار الوكت كلش صعب وما تفيد بيه الأمال
صار الوكت للمزعطه والقشمره والمرتشي والدلال
والدنيه صارت مهزله بيد الغبي والدجال
ما تسوه صارت دنيتك لاكاله تسوه ولانعال

ماجستير

يلي بلشت بالحاسوب وعفت الزراعة وهمها
كلبك تره يظل يلوب لوغفل كلبك عنها
اليوم اذن ماجستير باجر اظن دكتوراه
انذر طلي وانذر طير صدكني نذرك تلكاه
وحظك تره يبقى جبير لو تبقى صابر ترعاه
عد الله سهلات تصير بس انته تنوي وتنخاه
موسهلة ها الماجستير من ينأخذ بالحلة
بالحاسبة خذته وشوف ما خذته بالباكلة
أدري الشهادة تفيدك وسلاح تبقى بأيدك
تريده آلعلم ويريدك وكلما تزيده يزيدك
ادري العلم رفعة راس وللعقل نور ونبراس
ثق بالقلم والقرطاس ببحوره تصبح غطاس
المستقبل انته تصنعه والحلم انته اتبعه
ولو ردت تشعل شمعة بالامل كلبك طمعه
خلي الامل دوم وياك وبالامل صدك تنجح
حتى الوكت لو عاداك لابد يحن ويصفح
مبروك الك من ناقشت وانطوك جيد جدن
بلحم الدجاج انته الفزت واني الفزت بالتمن
مثل اليطك بيضة بطشت ع الريحة رايد يسمن
واليسمن بهذا الوكت جاهل اظنه وارعن
ساعة جبتلك وانتظر لوصرت باجر دكتور
موكافي اكتبلك شعر تستاهل اذبحلك ثور
مبروك الك ياابوشهد يابوحسن يابو زيد
كالوها من جد وجد ميمنعه لو صمم قيد
فرحتنه بيك جبيرة والفرحة باجر اكبر
لو فزت بالدكتوراه كيكة انه اسوي واكدر

والكيكة نترسها شموع والعشــا قوزي محمَّر
وع الكيكــة نكتــب مبـــروك
مبــروك الـــك
يا حيــدر

هذا الحلم ماريده

ما أريـد انا احــلم بعد
يواعدني بالـحظ والسعد
يأملني لو طال الأمد
ما أفكر بضيم ونكد
ما أريد انا أفراح وسعد
كالولي من جد وجد
صـارت حياتك يا ولد
لاظهر عندك لاسند
عصفور انا وغيري اسد
والأسد نايم بالرغد
كل همه يسلبني الرشد
لو صحت يا ربي المدد
عبدك تره عبد الصمد
مثلي ابدغيرك عبد
ضلينه بعدك يا سند
لاصبر عدنه ولاجلد
كل همنه نحلم للأبد

هذا الحلم ما أريده
وافكار كلها جديده
بالأمل نطلع سيده
كادر عليه ويبيده
ولا أريد فرصه جديده
وزين الأكل من ايده
بس حلم وانته تعيده
ومتفيدك التنهيده
مشغول ابد بالصيده
وبحضنه نامت غيده
وهي فرصته وعيده
كافي بعد لاتزيده
يدري بصلاته تفيده
وغيرك ابد ما أريده
مثل الحظى بتأ بيده
ولاعمل عدنه نجيده
نحظى بحياة جديده

الهجرة الى مصر

يابو مؤيد ليش رحت وعفتني
دوم بحزن ظليت من فاركتني

يمعود شوازاك رحت وعفتنه
وانته الكلت ماروح واترك وطنه

يا محمد اشوازاك واطلعت قبلي
وانه الجنت ظلك تره وانته لي ظلي

عفت العراق شلون وعفت السفينه
ظلت بعد فركاك كلش حزينه

ظلت عليك تنوح كرخ ورصافه
حتى النخل والماي كالوا حسافه

للقاهره اتعنيت والاردن اقرب
بعدك انا ظليت الطم وانحب

بعدك انا ظليت اظلم نهاري
بس الرعب والخوف بنشرة اخباري

بعدك تره بغداد صارت حزينه
صار الرعب كل يوم يمله المدينه

والاعظمية شلون رحت وعفتها
هذا اليجر بالطول وذاك اليعتها

حاميها والنعمان حامي السفينه
بس هوه تالي الليل تسمع ونينه

لاتشرب من النيل مي دجله اطيب
ترمس ادز مليان لوردت تشرب

اذكرني كلما تروح الخان الخليلي
بلكت اذا ارتاحيت يفرح دليلي

واسال ابو الهول لوزرت الاهرام
كله القلب يازين مايقبل ينام

كله وبعد وياه سولف واحجي
احجي وابد لاتخاف لو ردت تبجي

واتذكر المسكوف يم نهر دجله
وشارع ابو نواس كعداته تحله

ع اليسره تلكه الناس بالعرك تسكر
وع اليمنه يتمشون الاسمروالاشكر

تسمع نجاة تريد لو تسمع ام كلثوم
تكلك ولك لاتنام كافي بطر كوم

والباجه تالي الليل وعوازه نص راس
واللي يصبلك عمر والاسطه عباس

وريوكنه كيمر عرب والعسل فوكه
تجيب الربع بالايد والكعده جوكه

باكله وايدك بالدهن وفركاعه بالبيض
تقوي القلب وتفيد بالبرد والكيض

وتشريبنه وكت الغده والخبز تفتوني
وراس البصل وياه وتفضل اعيوني

لوباميه تنفخ نفخ ملغومه بالثوم
يتفاعل وياها الحلو ومايقبل يكوم

لو دولمه وبرياني غير الدليميه
لايشبع ولايفوخ ابن النعيميه

شنهو الغده هاليوم نسأل اهلنه
شنهو الطبيخ اليوم مو والله جعنه

ومن نشبع انام ونكعد اجواعه
ندور كعك ونكول هذي القناعه

يابو مؤيد شوف شلون افترقنه
حاسد اظن يازين يمكن حركنه

صرت انه بالبياع وبمصر انته
عهد الاخوه وياك صدكني صنته

سلم على الحلوين هند ومؤيد
وبوسات الك يازين والعمر الاسود

هم بالدرب تلكاه وهم جرح بايده
صار اللعب وياه يمشي بوريده

( جيفاجك ) انته اليوم لاتكلي ( بينه )
عفت العراق شلون وعفت السفينه

12/12/2006

وحده الغضب مو كافي

كلشي انتهى وكلشي راح

من يوم اكلنه التفاح

اسواقنا انترست فرح

وقلوبنا انترست هم

والظلم اصبح ايه

ويوميه ننزل بايه

وكل ليله عدنه قرايه

نجتمع بيها ونلتم

هيه سنه مو اكثر

كلحنه بيها اتقشمر

واللي فلت منها وراح

مااظن عليها اتندم

وحده الغضب مو كافي

حتى الامل يتحقق

والشمس تطلع كل يوم

نايم تشوفك مرتاح

تحلم وبالك صافي

بفراش ناعم دافي

تحلم تقود الثوره

وبس انته تضرب طلقات

تضرب ومحد ميموت

وبالحلم ماتشوف الدم

وكلمن كتلته بالحلم

يكعد ابابك ينتظر

تكعد يكلك هيهات

هيهات تنجح ثوره

مادام ماعدكم عزم

والامه كلها مطشره

ملتهيه بالقيل وقال

وتتراهن وتلعب بات

ياهو اليسوي الثورات

وحده الغضب موكافي

ويصير للثوره سبب

الجرح عفن والتهب

واليوم يومك ياشعب

ساكت وصابر ع التعب

وادريك ماترضه بظلم

وادريك عندك طلعات

كافي لطم ع الحسين

كلما يضيعولك حق

وكلما يضيعولك زين

تقوم القيامه بكربلا

وتكوم تضرب قامات

الحسين قاتل وانتصر

وحده وعبر

واستشهد وجان الظفر

من حصته

وان جان تدري بقصته

الحسين صدك ماانتحر

وانته على مر الدهر

فوك القهر

رايد تعيد مصابه

والحزن تفتح بابه

وباب الحزن مفتوحه

للي تلجمه جروحه

واللي نزف جرحه وسكت

خليها تطلع روحه

وخليها تشبع كفخات

اللطم صدك بدعه

ومدري منو المخترعه

خلانه كلما نحزن

يكبر حزنه وننجن

ويبقه فكرنا مشتت

والعزم بينه مفتت

ومادام ماعدنه عزم

الظلم حتمن يكبر

والحزن والهم يكثر

ومادام باقي هاالظلم

وماكو اراده ترده

ظلينه مثل الطليان

بينه الظلم يتغده

يتغده بينه واحنه

احنه النحد الساطور

وصرنه على مر الدهر

من كثر ماشفنه قهر

ومن كثر ماشفنه ظيم

ومن بعد ماايسنه

قررنا نلطم كل سنه

وبحجة الدك والظلم

نطلع قهرنه بعاشور

ونشبع بواجي واهات

ادري الظلم موباقي

والحزن اعرف مايدوم

علمنه صبر الحسين

لازم نكول ونحجي

نحجي ونكول ومانخاف

والرده تصبح ردات

مادام عدنه ذمه

وعدنه ضمير وانصاف

وعدنه لسان وشفه

لاتستحي وليش تخاف

وعدنه امر بالمعروف

ميصير ياخذنه الخوف

وكل وكت نكعد ونشوف

الظلم ماشي بزفه

يضحك علينه ومايعوف

غير الحزن واللعنات

والالم بالهم ملفوف

وصار الحزن من سنين

مثل الهوا نتنفسه

ويانه يكعد ويكوم

وبكل وكت نتحسسه

وصرنه عليه متونسين

من جنه نكتب ع الطين

ومن قبل ماينزل دين

ويطلع نبي

من قبل بابل والسبي

عرفنه الحزن واخترناه

ومثل الطفل ربيناه

يتعلم وخليناه

عشعش وخزن بالصدر

وسنين عفناه ينام

ولمن كبر علمناه

يكعد ويلطم بالكدر

كالوا علينه مخابيل

بيوم الطبك متعلمين

نلطم ونضرب زنجيل

وكل سنه نعيد المقتل

ونعيد نفس القصه

والقصه مو قصة لطم

القصه قصة انسان

فرط بروحه من اجل

فكره وعقيده وايمان

والقصه قصة مبدأ

ماغيره وقصه دين

رادوا جماعه يحرفوه

باسم النبي

وهمه النبي ميحبوه

من يوم كالوله نعم

من فتح مكه وانتقم

والساده سواها غنم

وبايده كسر كل صنم

وبالكوه دخلوا للدين

وبالكوه صاروا اسلام

كالوا سنه لو سنتين

يموت النبي

وترجع بموته الاصنام

وخلوا حقدهم مدفون

وبالدين جمعوه للحقد

وكل سنه يزداد الدين

وناموا على كره النبي

ناموا على كره سنين

ومن كثر ماشبعوا حقد

ومن كثر ماشافوا زين

كعدوا وشافوها صفت

طلعوا حقدهم بحسين

ومادام مات المصطفى

واهله وابن عمه التهوا

بالنبي شلون يدفنوه

كلها قريش اتجمعت

واتحضرت

وتامروا يوم السقيفه

وقرروا

ينسون ماقاله النبي

بيوم الغدير ويمحوه

وكلمن يقول الصاحبه

انه انسحب

وهذا ابدالي انتخبوه

وانتخبوا اكبر واحد

جي بالمغاره من ختل

وياه خايف يلكوه

ويكله اثبت لاتخاف

ويانه الله وميصير

الوياه الله ياذوه

وضاعت حقوق ورادوا

حق البتول يضيعوه

وميراث ابوها يبوكوه

وصارت السلطه العوبه

والدين اصبح طوبه

كلما يفش ينفخوه

وكلما يكللهم علي

قال النبي

يكلوله عدنه القران

وحفاظ عدنه يجمعوه

وتمسكوا بالسلطه

اتمسكوا بها زين

خافوها تفلت وتروح

ويضيع كل السووه

وخلوا علي بالشورى

والشورى لعبه جديده

عرفوا علي ماينغلب

خلوه بيها وغلبوه

وسنين صابر ينتظر

ينتظر حقه يرجعوه

ودارت الدنيه وصبحوا

شافوا علي صاير خليفه والشعب

الشعب كلهم يردوه

كالوله ابسط ايدك

هذا الحجي ميفيدك

انته الوصي ونريدك

كل اللي قبلك خربوه

وشافوا علي ماينكحم
والسلطه عنده موحكم

وماينطي فرصه للظلم

وحكمه مثل حكم النبي

ومايفرط بهذا الدين

شافوا علي مثل الجبل

وماتنفع وياه الحيل

ومن خسروا بحرب الجمل

نصبوله فخ بصفين

وصفين جانت خدعه

تقشمروا ربعه وعافوه

وصار الجبل امره سهل

لاعنده كول ولافعل

وداروا عليه ولد النعل

صعدوا عليه وعبروه

وبسيف مبري ومسموم

وبايد حاقد مشؤم

وبسبب تافه مزعوم

اتواعدوله برمضا

بالمسجد وكت وذان

ساجد يصلي

وشيطان

ينتظره يرفع راسه

ويحسب عليه انفاسه

وبضربه وحده بفاسه

ومن قال الله واكبر

بالله واكبر طبروه

وجان الحسن امره مسهل

قشمروا مرته وسموه

ومابقه غير الحسين

ميصير وحده يخلوه

والناس كلها تريده

وكلشي اليكوله تعيده

وحوله الزلم ملتفه

وشفه تقول الشفه

الظلم لازم ينزاح

ولابد قياده جديده

والظلم كاعد مرتاح

يتفرج وعنده سلاح

والوضع كله بامره

وخيوطه كلهن بايده

ورادوها بالكوه تصير

وبعد الخطط والتدبير

جابوا يزيد وحطوه

والناس ماعدها علم

والفتح حلكه واعترض

كدروا عليه وسكتوه

وثار الحسين وماسكت

وشبت النار وماطفت

وابتدت قصه ومانتهت

الحسين لازم ينهوه

بهذي السنه وهذا الشهر

ويصير عبره للبشر

وترجع الساده ساده

والعبد يرجع عبد

وجان القصد

الدين يبقه بس اسم

وتجمعت كل الزلم

متفقه كلها ع الظلم

بالكوفه  حطوله الطعم

وصار العزم

من المدينه يطلعوه

وللكوفه وحده يجيبوه

وبكربلا بيوم الطبك

كدام اهله يذبحوه

وشالوا الراس وهللوا

وتباشروا

وكلمن يصيح بصاحبه

الخيم لازم تحترك

ماصدكوا

هذا ابن بنت النبي

كلهم بذبحه مشترك

ونفس الجماعه تجددت

وتحججت باسم النبي

لبسوا البرده وقرروا

هالدين لازم يطفوه

والمشكله شيسون

ماعده حسين يكتلوه

لكن اتفقوا كل سنه

المقتل بيوم الطبك

باول اذاعه يذيعوه

المقتل يذيعونه الصبح

جنهم صدك توابين

ويانه بيبجون الصبح

وبالليل وبليه خجل

كدر الحسين يكلبوه

وكل شيعي لازم ياذوه

والشيعي عدهم كافر

ومتصح صلاته وباطله

مادامت ايده مسبله

ويصلي ع التربه شلون

وحي على خير العمل

كل وكت بيها يوذنون

والله ومحمد وعلي

كل وكت بيها يحلفون

وايامهم كلها حزن

صاير بدمهم معجون

وحتى بفرحم يبجون

وتخبلوا

كلما يذبحون حسين

يطلع مكانه مليون

والمشكله مايدرون

الدين لوما الشيعه

جا صار سلعه والناس

تشتري بيه وتبيعه

1999

واتهددني

واتهددني ؟

مااتعاون ويه امريكا

ولاعلي وياها البنيان

لاابني وياهم مشروع

ولاشوف وياهم عمران

متخليني احجي وياهم

ولاتخليني امشي وياهم

تتحداني وتتحداهم

وتكلي وياهم من تمشي

اضرب راسك بالحيطان

واخطف ابنك واتحداك

وتبقه ابيتك بس نسوان

داعيكم هتلي وعراك

وتاليها ياابن الفسكان

ذوله الجانوا يتحدوك وتتحداهم

فاتوا بينه وفاتوا بيك

وطيحوا حظك الامريكان

عاطل كل وكتي وجوعان

تتونس من افتح جنبر

واتمر من يمي وتتقنعر

تستنكف تسالني شلونك

وحقدك باين بين عيونك

ثلث تالاف الراتب جان

عشت بظلك بالحرمان

شفت الجوع وشفت الذلة

غير الهم اشكال الوان

تضحك

لو كتلك جوعان

وتضحك

لو كتلك تعبان

وتضحك

لوكتلك احلامي

ضاعت كلها

وصارت باحضان النسيان

ظلمك ماسواه انسان

لاهتلر كبلك سواها

ولا هولاكو ولا نيرون

جنت تشوف الناس ازغار

وانته جبير

وغيرك وحدك ميعرفون

تستحيف من نسجد لله

ونذكر فرضه

تتمنه الوادم تتوضه

ولاجلك بسن انته يسجدون

وانته وربعك تفتهمون

موكتلنه

من جيناكم

جنتو بعوز

جوعانين وتعبانين

وبنص نعال اطركون

وسويناكم

احسن ناس

علمناكم

فهمناكم

ركبناكم سيارت

وصعدناكم طيارات

وسفرناكم

لامريكا وصلتوا وشفتوها

ولندن زرتوها وعفتوها

ومليتوها

وباسم الحزب القائد  صرتوا

مسرورين وفرحانين

شتريدون ؟

كولوا واحجوا

ولاتخافون

محد يكدر يحجي وياكم

الحزب القائد وياكم

واني وياكم

بس لاتصير بحزب الدعوة

ولاتكعد وحدك بالكهوة

تقره الجيفارا ولينين

نجم

بمناسبــــــــة

استشهاد

نجـــم

شقيق الاخ فاروق عبدالله

بتاريخ12/2/2006

لك يانجم لاتنزل بالسما معلك ابقه
الارض صارت منزل بس للحقد والفرقه
بين الخلك اسمك صار يعني العطف والرقه
الاحسان عندك موهبه والخلق اصفه وارقه
عرفنه الرعد من صوته والمطر ينطق برقه
ماشفتك اني من سنين لكني مثلك اشقه
بهذا الزمن الاغبر ليش واحدنه مثل السقه
شايل على ظهره الماي والزمن ماكل حقه
الدنيه بعدك متفيد ماتسوه بعدك علقه
والناس بعدك يازين صاروا عبيد الورقه
بعده محرم ماخلص والطبك بعده بشهقه
بالحزن مشغوله الناس مابين غربه وشرقه
داروا عليك الاوباش يستهدفون الفرقه
كتلوك لكن مادروا انته الصرعت الطلقه
والطلقه هيه التختار وانته اخترت ان تبقه

وبموتك انته يانجم العدل اثبت صدقه
انته اثبتت للارهاب اصل الوفاق وعمقه
الارهاب قبلك ما عرف غير القتل والسرقه
اعمى وهويته مزوره واهدافه كلها بورقه
وانته الفزت بالجنه ولاعلى الرتب تترقه
وحقك اخذته وغيرك بالغدر ضيع حقه