لحك توب

لحك توب

كافي تجمع بس ذنوب

لحك توب

ما تسوه الدنيه ومتفيد

ما دامك تركض وتلوب

لحك توب

واذكر ربك

بلكت يغفرلك هلمره

وتطلع تطلب مو مطلوب

لحك توب

صلي وصوم وزكي وانطي

ماتسوه الدنيه بلا دين

وتدرى الدنيه كلها ذنوب

لحك توب

ماتسوه الدنيه تحابيها

وتلعب بيها

ومتغاوى بيها ومجلوب

لحك توب

عمرك موبيدك صدكني

موبيدك تدخل للدنيه

ولابيدك تطلع من عدها

بامر الله الدنيه يمشيها

وكلشي مقدر لو مكتوب

لحك توب

ولاتفكر باجر شيصير

باجر من تحسب مشطوب

لحك توب

لحك بالفازوا بالجنه

كبلك واجتازوا الدروب

درب الهم ودرب العيشه

ودرب المزه ودرب الشيشه

ودرب المال الغير بيده

حال الناس الضاكت طعمه

ومسحوره لسه بورنيشه

ودرب الزنكين المغرور

وع العالم بس نافخ ريشه

ودرب النسوان الخلتنه

نفكر بيهن ليل نهار

وبينه يلعبن سله وفيشه

وهذا العمر تريد تعيشه

بليه ذنوب

لحك توب

صدكني الدنيه ملعوب

لو وحدك تدخل للدنيه

تفوز وتبقى بيها مهنه

لو وحدك تطلع مغلوب

ادرى تفكر بالزينات

هذا انطيته وهذا اهديته

وهذا اسندته وهذا حميته

وهذاالوكلته وشربته

وهذا الداينته وماسالته

وهذا العلمته وفهمته

ولاغثيته ولاضريته

وفاتح بيتك بس للناس

ومحد جابك مره البيته

وتداين وانته المطلوب

ومادامك تصرف ع الناس

عند الكل تبقى المحبوب

وكل زين تسويه محسوب

ويحسبولك بيه عشرات

ويشطبولك بيه عثرات

ويمسحولك بيه زلات

لكن صدكني الزينات

ماتمسح وحدها ذنوب

لحك توب

لاتظل خايف لو مرعوب

تابوا عنك لوظافولك بعد ذنوب

وما متاكد

مسحولك ذنب السويته قبل سنين

من تسكر جنت بلا مزه

وتشرب سادة

وكدام العالم تتباهى

وحافظ اسماء المشروب

ياهو الاصلي

وياهو البيه غش ومضروب

جنت اتدافع عن الخمره

وتحجي بحركه

ليش القران محرمها

وليش الاسلام مظلمها

ويمكن بس اني الافهمها

من اشربها ابقى مطنش

باحلامي طاير ومفرفش

وتحلى الدنيه بعيني ويحلى

كلشي الجان بعيني مغوش

وكل سويجاتي مطفيها

وريحة حلكي بس تفاح

وتدرى اليشرب عقله يضيع

وروحه اتضيع

وكلما يشرب جبده تذوب

لحك توب

كافي تفكر بالمكلوب

مامعقوله هاى الدنيه

ندخل بيها

ونطلع منها بليه ذنوب

وما معقوله

ندخل للجنه بملعوب

لحك توب

وفكر زين

لاتاجل التوبه البعدين

محد ضامن عمره اليوم

وكلما تاجله يزيد الدين

وغلطه الوحدة تصير اثنين

ومحد يشفعلك صدكني

من يسالك ربك وين

وين الزين اللي سويته

وين الخير الكلت اجنيته

والفرصة انطيتك مرتين

شوجاى بطرك السلتين

سلة الشر اتناحط بيها

وسلة الخير كبالك تمشي

بس اتريد تلحك بيها

واتحط بيها

بالسر اى شي

وجاى تقابلني بياعين

واعفو عنك كلي شلون

كبلك هم حاول فرعون

من شاف الموت الملعون

صار كباله

امن وحده برب الكون

هذا الايمان الميفيد

المابيه ريحه ولا بيه لون

ولاتكلي تاليها شلون

مالك عون

ماى تبده

وشيرد الماى المسكوب

لحك توب

فرصة انطيتك واتماديت ..

وكتلك توب

ولاصمت الاجلي وصليت ..

وكتلك توب

ولازكيت ولا حجيت ..

وكتلك توب

ومديت ايدك واتعديت ..

وكتلك توب

وكدامي جم مره ازنيت ..

وكتلك توب

انجنك ناسي انته اليوم

لاتظن اني يوم انسيت

كلشي مسجل بالارقام

بالدفتر عندى ومكتوب

وكتلك توب

العنده كلب المايهديه

مثل العنده عشر كلوب

شتفيد كلوب الماتهدى

لاالصيني تفيده ولا الهندى

ولاايمان يفيد وادري

الايمان يفك المصلوب

لحك توب

عنتر لاتصير بهالدنية

وتابع لاتصير وشيبوب

طلكها الدنيه ولاتغرك

ولاتخليها يوم تفرك

كلما تجرها تالي تجرك

ولاتكول فلوسي واموالي

بيها اتغيرت كل احوالي

وهيه السوت كلشي ابالي

وشالت همي وهم اطفالي

محبوبه وشافت محبوب

لحك توب

من ازنيت اشكلت الروحك

مافكرت باالله يشوفك

معرين كدامه وتتلوه جنك ديج

ساعه تفوخ وساعة تهيج

ودومك تركض وره بت حوه

معرت بيها وهيه معرته

مثل النايم هو ومرته

بالظلمة تفوت انته وياها

وتكضي الشغله وياها بسكته

بيدك انته تسد الباب

وهيه تكوم تعدل البرده

واطبلها شايل بيدك

من اورزدى ريحه واورده

وتطلع منها بتالي الليل

وجواريبك فرده وفرده

وترجع تالي بطرك الخرده

وماتدرى شلون تعارفتو

وتلاكيتو

وتعاملتو وتحاجيتو

وتدرى بليلتها بخمسين

وتعاملها تكلها اشدعوه

جنك بالسوك وبالعلوه

بس الفارق يبقى جبير

بين التنكه وبين البير

هذي الحد الموت وياك

ع الحلوه وع المره وياك

تبرد هيه تصير اغطاك

وهمك هيه تشيله ابدالك

تضربها واتكول اهواك

شتطلب منها اتكلك هاك

تقشمرها ابفوطه ودشداشه

وشحاطه من اورزدى وماشه

طبتك عدها تسوه الدنيه

وكلما تغثها تكلك زيد

ويوم التزعل جنها بعيد

تزعل وتكلك حياك

مثل الحبل السرى اتكطعه

يبقى دوم يحن الصرته

وذيج بسرعه تروح وياك

تنساها بسرعه وتنساك

تتعيقل من تغازلها

وتتزعل من تجادلها

وهيه الراكبتك بالكوه

ودوم تكلك جيب وهات

هذا السي دي اخذه واصلحه

وحارمتك حتى من الضحكه

ومنسيتك طعم الفرحه

ومراويتك عين الوكحه

ومفرحه بيك الشمات

ولحم الزرته وشفته اليوم

جنك لازرته ولاشفته

تحجي وياها تكلها الونسه

ماتحلى بس بيه وبيج

وتترجاها تكلها انطيني

واني من خرجيتي انطيج

وابقى اسبوع انتظرج وحدج

واعمل لاجلج واحلم بيج

واتعب واركض ليل انهار

لو اكتب لاجلج اشعار

دايخ كل واكتي ومحتار

شلون نفوت بهذا الغار

التركض لاجله ازغار كبار

وسال الدم من اجله انهار

شكد ازواج لاجله انتحروا

بالعشرات وبالميات

من اجله مات ابن نويره

وقيس اتخبل لاجله ومات

هوايه دول قامت من اجله

وسقطت من اجله حكومات

وكلمن مات

مات ويعرف بيه غدار

قوته بضعفه وضعفه بقوته

وقاد رجال بهذى وذيج

كلكم صرتوا بحزب الديج

كل واحد حاضنله ابنيه

وكل ابنيه  وياها رفيج

كلكم صدكونى مناويج

صرتو النسوان تعبدون

وبس بالدينار تهتفون

وبالدنيه الغبره تلعبون

ولكن تالى من اتضيج

ومن رحمة الله تاءيسون

بالشدة الالله تركضون

وتعتذرون

وعلى كد الشدة تعبدون

ومن يفرجها الله وياكم

وتفرحون

بسرعه تفوخون وتنسون

وللدنيه الغبرة ترجعون

وكلها اتدور البرستيج

هذا اليركض لاجل اولاده

وهذا اليعبد مرته اعباده

وهذا اليجمع بس المال اللمه وراده

متهني ومشلوع افاده

شبعان وميسمن زاده

فرحان وراضي بهالدنيه

ويدرى الدنيه كلها كواده

وشتفيد الدنيه المابيها

جلمة خويه وجلمة داده

بيها اتطب يمكن للجنه

ويادوب اطبب يادوب

لحك توب

كافي تفكر بالاحزاب

بدال الرب عندك ارباب

ومالك شغله بالله وحزبه

معزل حزب الله ومسدود

حزب الله بس ينطي وعود

وميلفي بس المكرود

وشغلات الله بيها حدود

لازم تعرفها وتفهمها

ولاتايس من توصل يمها

ومن تغلط هم رد ردود

مفتوحة ابواب الله وفوت

لاتكول انسيت وسامحني

صارن كلهن غصبن عني

جنت محسب عمرى طويل

وباقي بها الدنيه وماموت

وما ظنيت الكبر يلفني

وكبله يخلوني بتابوت

مامعقوله يموت الحوت

هيجي بساع

ويوكف كلبه

وينهار بسرعة البنيان

بلحظة يضيع

بين الحيتان ويتلاشى

وكبل شويه جان معبه

بيبسي وموطه وبيذنجان

قبل شويه جان انسان

ساعه يجول وساعه يصول

يظلم هذا ويظلم ذاك

واليحجي بالكوه يسكته

ومافكر ولاساعه بربه

وتاليها صارت اعماله

وخيره وشره بالميزان

وجان يظن من يقرب وكته

بداله يدزلهم مندوب

لحك توب

ولاتتعجب من تموت

ادرى الكبرك من تفوت

اتحس بوحشه

وراح اتصيح

ياعالم ولكم معقوله

تتساوه الزينه ويه الثوله

ويشملنه كلنه الناموس

معقوله يموت الطاووس

شلون يموت العنده فلوس

وكلشي محسبله ومدروس

جنت معلم انطي ادروس

وللغشمه مالف قاموس

شلون يمشون المغشوش

ويحلفون بكلشي الجان

ويبوكون من الميزان

والمعيوب شلون تبيعه

وتخليله شويه رتوش

طكوا من صار الدولار

وصارت عدهم تالي كروش

بيها اتريد اتطب للجنه

وتكضيها بالجنه اتهوش

سهله الشغله

ومن تحسبها

ماتكلف بالطبه قروش

غيرت الناس وماكدروا

بالكوه الناس يغيروني

بفلوسي تغيروا واطباعي

كلها تصيح باسمي

وكلها تكول اشحلوه اطباعه

وكلها التخدمني وتركضلي

وكلهم ادريهم طماعه

ويدرون باصلي وينسون

من جانوا باصلي يعيروني

ويصيحولي ابن الراعي

وابن الراعي اليوم اتغير

من صارت بجيوبه فلوس

صاروا بفلوسي يحبوني

ويصيحولي شيخ افلان

وع الاكله الزينه يعزموني

ويوميه بصدر الديوان

ع المنبر وحدي يكعدوني

ويفرشولي بساط الزين

ومن يسكوني بماي العين

ويتمنون

اخطب منهم

وحده اثنين

غير العندي من النسوان

واطلع منهم لو سكران

لو صاحي ولكن مو واعي

ومكيف جنت بغيبوبه

بعالم ثاني حلوه دروبه

عالم ثاني ومابيه جوع

ولااحزان ولاالام

ولاهم بصدري مزروع

ومااذكر فد يوم ابجيت

ولو ابجي ماعندي دموع

عقلي فارغ

كلبي فارغ

وبطني مليانه ومتروسه

ومادام المعده ابحبوحه

هيه ابدال العقل تفكر

وهيه بدال القلب تحن

ولو فرغت بطني مااصبر

كل اعظامي تكوم تون

مثل البرميل المليان

من يفرغ من كيفه يرن

وكلبي معلك بالنسوان

هايم كل وكتي اولهان

اركض ع الصعبه وع السهله

معجب بالسمره وبالشهله

وبالشكره ولو جانت اغله

مثل الثور اليعرف شغله

وقوتي قوة الف حصان

ومرات ارضى بكلشي الجان

بالتصعد بالتاتا ويايه

منتظره من عندي احجايه

والتصعد وحدها ابكيه

رجال وعبالي ابنيه

تكلك اني حلوه ولكن

اجمل من باسكال ابايه

والتمشي بطرك الستريج

تصبغ باحمر نوبه وبيج

بيضه وتلمع جنها مرايه

والتطلع دوم مغشايه

وغير الترفع حمره الرايه

واللي يلطمن ع الحسين

وياهن الطم واتحفى

وعيني ازرزر ع الملايه

واللي اداوم بالكليه

واللي عدها اليوم قرايه

واللي تقره بدار ودور ودور ودار

والخريجه

واللي يخربن ع التجار

واللي اتدخن مثلي وتشرب

بيره وجن

تعلج واطك سن بسن

فرحانه وكلشي اللي تكوله

لابيه لوله ولا بيه ان

وادري بيهن من يطلعن

لابد عدهن قصد وغايه

وعدهن للطلعات اعذار

وكلهن عندي  محبوبات

وكلهن ع الحب معلمات

ويعرفنه زغار كبار

حبهن علمني وخلاني

بين العالم صرت انسان

ويعجبني

صارن كلهن

حتى ام الكيمر تعجبني

والخبازه

والدلاله

وام الخضره

واللي تبيع كريشه وبازه

والتاخذ خيرة بفنجان

وتعجبني بنت الجيران

واللي تحب وعدها اسرار

واللي تغار

مافوتها

ومافوت حتى الخطار

واللي يصيحن ياستار

لوشافنه

يلجع ويكولن جمار

لوضاكنه

يردنه دشداشه يصير

ويلبسنه

لو محبس ليلو وترجيه

وبالمعصم يردنه سوار

ومرات كلاده يعلكنه

وليل نهار يفكرن بيه

ولاجله يركضن ليل نهار

ولو حصلنه

لازم بالتالي يركبنه

ومن قوته يصيحن جبار

واللي يحبنه يخلنه

بنص العين

ويضمنه

لاتسالني

ماادري  يضمنه وين

بيا رازونه ويازاغور

ويدارنه

مثل البلبل والعصفور

مدلل كل وكته وكركور

والحب يدورنه ادواره

ميخافن من جمره وناره

مشغولات بكل اسراره

ومن يلدغهن مره الحب

ولا حرز يفيد ولاطب

ويوصن ياهو اللي اطب

لاتخافين

فوتي وجربي وضوكي النار

صدكينه الحب مو غدار

صح الحب يلسع مرات

يلسع لكن موزنبور

وليش يركضن وره عبدالله

وعبدالله يعرفنه حمار

جاهل واغبر لوكي وعار

كاعد بالملهى وبالبار

والخريج وعنده افكار

ميحبنه

ولايريدنه

واليقره ويسمع موسيقى

ويكتب للحلوات اشعار

ميفضلنه

وملعبات يدورن ونسه

كلما اتكلها اتكلك هسه

انته تعرس يوم بعمرك

وهيه دوم وياك معرسه

ومن تموت وتلزم عده

تحجي وياها اتكلك خرسه

ومن تريدك تحجي بهمسه

غنجة تصير

وتصبح شرسه

مكلوبه خلقتها ونحسه

وماتقبل منك اعذار

من تاذيها

وبس عين الحمره تراويها

بثلاثه اطلكك والخمسه

وراسك بالبلوعه اطمسه

ولو رايد مره تعاتبها

تزمخ بيك

واتكلك مثل المجنونه

اشدعوه اشصار

وليش يخربن ع الشعار

اليشرب خمره ويلعب زار

حبهن صار بهاي الدنيه

جنه ونار

بحبهن اتحدى الاخطار

ومايهمني العيب ولا العار

جا وين نودى المليار

وهذا المال الصار بسرعة

باللوتو لكيته وبالقرعه

بيا قاصة انضمه وياغرفه

بيا صنعه انشغله وياحرفه

ومن ايضيع

ماكولن ابدن ياوسفه

بفلوسك تكدر ع الدنيه

وتلعب بيها

وبيها تصير انته السلطان

وبيدك انته اتغير الدنيه

واتغير حتى القران

ولا تكولولي كافي وبس

غيرك مل وتاب وحس

راهب لاتصير ولاقس

ولاتظل دومك دون جوان

كاعد جنك على بركان

صدك ميطفي النيران

غير الغيره شوية وصبر شوية

وفوكاها شوية ايمان

شيكول العايش حرمان

وعايش بين البطرانين

اوشيكول المايدري بروحه

من همه مل و من نوحه

كلما اطيب تصيح جروحه

وغيره بهمهم مرتاحين

وانته تصيح يمعودين

اخذوا فلوسي كلها و لكن

لاتحرموني من النسوان

ادري النسوان يحبني

ويدرن بيه اعوج احجي

وميهمهن اضحك لوابجي

ويعرفني بنص لسان

واطرك جنت بنص نعال

فارغ من جوه ودجال

بس احوالي عال العال

عندي فلوس وعندي مال

وحيل العندي يهد جبال

وبس اني الوحدي الرجال

رجال وكادر ع الدنيه

ومايخطر على بالي الموت

ميصير تموت الحيتان

وهذا البنيان العليته

وبيدي ابنيته

معقوله يضيع بهالسرعه

ويفطس تالي السوبرمان

قابل اني ياهو الجان

جنت احلب بيهم يوميه

تالي شلون اطلع محلوب

لحك توب

كافي تفكر بالنسوان

ساعه تفكر بام حسين

وساعه تفكر بام احسان

اليوم انحطك بالميزان

وتدري بشغلتنه وصنعتنه

بهذا اليوم انطلع اعيوبك

اتحضر يالله وفرغ جيوبك

لاتحجي وخل تحجي ذنوبك

ميفيدك تشرد من عدنه

ويوميه خاتل بمجان

وميفيد اتغير العنوان

وتصبغ وجهك بالالوان

متنكر جنك افريقي

ساعه تحارب ويه الزولو

وساعة تحارب ويه الهوتو

ويوميه طالعلي ابفيكه

لو خاتل جنت بامريكا

لوبالصين

نجيبك حتى من اليابان

عبالك

ماتموت اليوم

وتوكفلك عشرة محزمين

اليوم انوكلك مركة طين

مكيف عندك قصر شلونه

ويملي العين

وذهب العندك بالاطنان

عدنه الكل صاروا سيان

لحك توب

دنيه وتمشي بالمكلوب

عزرائيل بصفك يمشي

وعماله يسجلولك كلشي

ينتظروك ومتحلفين

وميأجلوها اليوم الدين

ماعدهم هسه وبعدين

اول مااطب يصيحوك

ومتفيد تصيح معودين

وميفيدك تبجي وتتوسل

وحدك ع الرحلة يكعدوك

ويسألوك

احجي شسويت بدنياك

ولاتتلعثم

جاوب زين

كل اعمالك صارت دين

محد يمك تنقل منه

ومحد يكدر يتوسطلك

جاوب يالله وبالك تكذب

ايدك تشهد كبل العين

شلون تريد اتطب للجنة

وانته الضارب مو مضروب

ولاتكلهم جنه سلاطين

وجنة ملوك

ومافكرنه بيوم الدين

ومافكرنه الموت يذلنه

ويبهذلنه

وانطب تاليها مصلخين

وصرنه وياكم متساوين

كبال الخالق والمعبود

ياكلنه تاليها الدود

ونهايتنه تصير لحود

وكبر يطمنه بليه حدود

اظلم من جوه ومسدود

وفوكاها ينطرنه حساب

وكلمن شايل بيده كتاب

يسجل ع الطالع والطاب

مييفرق بين السلطان

وبين الحافي والبواب

وبين العنده فلوس هوايه

وبين الماعنده ومحتار

باكله ومايه

كلها تصبح تالي تراب

وربك يحكم بين الناس

بين الطالب والمطلوب

لحك توب

هاي الدنيه كلها ذنوب

اصبر بيها ولاتستعجل

لاتأيس منها وتتوازه

ولاتغرك صحتك وفلوسك

ولاتحسب بيها انته مطول

ميفيدك تره يوم عوازه

دينك بالتوبه توفيه

وباعمال الزينه تصفيه

واصبر كبلك صبروا ناس

صاروا للعالم نبراس

يعقوب وعيسى والياس

ونوح وموسى وكبله ايوب

لحك توب

احبابك كلهم عافوك

دفنوك اوحدك خلوك

وتدري بيهم ميفيدون

ميفيدك اب ولاام

ولااخوة يريحون البال

ولايفيدك عم ولاخال

وبس ذنوب تكوم تلم

من يوم الجيت بهالدنيه وانته تصيح

شايل هم العالم كلها ومحد يهتم من اتطيح

ومن توكع محد يوكفلك

وحدك تبقى كبال البير

تترس ساعه وساعه اتدير

واضيج ابعينك هالدنيه

وتنسى الدنيه

وتالي اتصير

ريشه وتلعب بيها الريح

وميفيدك غير التسبيح

يمسح بيه ربك الذنوب

ولحك توب

1