نفطية دولتنا وشوف

نفطية دولتنا وشوف دولتنه نصها زباله
صار النفط للصوبات والمنقله واللاله
ثلاثين مرن والحزب والثوره صاروا عاله
عاله على كل الشعب والشعب شوف شحاله
عمال صاروا للحزب والسلطه تدري بحاله
احلامه طارت بالهوا ويمكن يطير نعاله
الحصة يوميه شكل ونص الطحين نخاله
العقول كلها هاجرت والبقت كلها سحاله
والزلم نصها استشهدت وتيتمت اطفاله
حيتان صاروا والشعب كل الشعب بطاله
صارت صناعتنه خرط والعلم عاف رجاله
قائدنه يحجي بعنطزه وماتدري شنهو اباله
يوميه صارت عادته يطير علينه افياله
وخلانه كلنه نعتقد محد يصير ابداله
قادر على كلشي وصفت الغاز كلها افعاله
حربين طبينه وبعد بالحرب تحجي افعاله
بصاروخ يضربنه العدو واحنه نصربه ابكاله
وكل ازمه يخلقها العدو يشرب عليها ابطاله
وبيها يدفعوه للحرب ويجددون اماله
والسلم ميعجبه وصار اسم الحرب يحلاله
لوبيده يفنيه للبلد ومحد يكله لا له
اطلال سواه للبلد وكاعد على اطلاله
ودولتنه صارت للامن والشرطه والنشاله
كل شي انتهى بهذا الوطن لاتظن تشوف اهلاله
باع النفط للاجنبي ويمكن يبيع اجياله
14/2/2000